Ku wa 18 Ugushyingo 2022, Komisiyo y’Igihugu ishinzwe Abakozi ba Leta yagiranye inama n’Ubuyobozi bw’Akarere ka Ruhango yitabiriwe n’abagize Inama Njyanama na Komite Nyobozi haganirwa ku micungire y’abakozi ba Leta no guteza imbere imyitwarire mbonezamurimo mu bakozi ba Leta.

Perezida w’Inama Njyanama y’Akarere ka Ruhango Bwana GASASIRA RUTAGENGWA Jérôme yahaye ikaze abitabiriye ikiganiro yakira Visi Perezida w’Inama y’Abakomiseri n’Umunyamabanga Nshingwabikorwa wa Komisiyo y’Igihugu ishinzwe Abakozi ba Leta hamwe n’Abakozi ba Komisiyo bari kumwe ndetse n’abitabiriye ikiganiro bose.

Umunyamabanga Nshingwabikorwa wa Komisiyo, Madamu Angelina MUGANZA yashimiye Ubuyobozi bw’Akarere ka Ruhango umwanya bwageneye Komisiyo n’imikoranire myiza hagati y’Ubuyobozi bw’Inzego zombi, amenyesha abitabiriye ikiganiro ko guteza imbere imyitwarire mbonezamurimo ari inshingano nshya Komisiyo yahawe, bityo Abakozi ba Leta bose bakaba basabwa kumenya no gusobanukirwa indangagaciro z’umwuga n’imyitwarire mbonezamurimo bikwiye kubaranga bikabafasha kurangiza neza inshingano bashinzwe. 

Ikiganiro kijyanye no gushaka, gucunga Abakozi ba Leta, guteza imbere imyitwarire mbonezamurimo no gukora kinyamwuga mu bakozi ba Leta cyatanzwe na  Bwana MUPENZI B. Ezechiel.

Mu mwanya wo kungurana ibitekerezo, abitabiriye inama  basobanuje ingamba zihari zo gukumira igihombo Leta itezwa n’ibyemezo abayobozi bafatira abakozi bidakurikije amategeko, ikibazo cy’ibigo by’ubuvuzi usanga bifite abakozi badahagije n’ikibazo cy’imitangire y’ibizamini by’akazi aho usanga hari umubare munini w’abakandida bashaka akazi ariko  ntihaboneke imashini (computer ) zihagije zo gukoreraho ikizamini.

Ubuyobozi bwa Komisiyo bwasubije ibyo bibazo ariko bwizeza Akarere ka Ruhango ko bimwe muri byo bigikorerwa ubuvugizi mu zindi nzego.

Mu rwego rwo kunoza imicungire y’abakozi ba Leta no guteza imbere imyitwarire mbonezamurimo y’abakozi ba Leta, Ubuyobozi bw’Akarere ka Ruhango bwiyemeje ibi bikurikira:

•  Gufata imyanzuro yubahirije amategeko igihe hari ibyemezo bigiye gufatwa mu rwego rwo kwirinda ingaruka zo kuba Urwego rwajyanwa mu nkiko n’igihombo bishobora guteza Leta.
• Gushyiraho gahunda ihamye yo guhugura abakozi bagitangira akazi ku myitwarire mbonezamurimo n’Indangagaciro z’umwuga;
• Kwitabira gahunda z’Itorero  ry’Igihugu ku bakozi ba Leta;

Gukora ibiganiro ku myitwarire mbonezamurimo kandi raporo y’ibyo biganiro ikajya ishyikirizwa Komisiyo y’Igihugu ishinzwe Abakozi ba Leta buri gihembwe.