Ishingiye ku nshingano zayo, Komisiyo ikora igenzura mu Nzego za Leta ziba zatoranyijwe hagendewe ku mpinduka ziba zabaye muri izo nzego cyangwa ku bibazo byazigaragayemo. Igendeye ku mpinduka zabaye, Komisiyo yakoze igenzura mu karere ka Gisagara no mu mirenge ya Kibirizi na Save rigamije kureba imicungire y’abakozi n’iyubahirizwa ry’amategeko, amabwiriza n’ibyemezo bijyanye n’imicungire y’abakozi ba Leta n’imitangire ya Servisi kuva mu mwaka wa 2013-2016.

Abakozi ba Komisiyo barimo kugenzura amadosiye

Muri iryo genzura, ku bijyanye n’imicungire y’Abakozi  Komisiyo yasuzumye niba   Imbonerahamwe y’imyanya y’imirimo y’Akarere n’iy’Imirenge ishingirwaho mu gushaka abakozi zaremejwe n’Inzego zibifitiye ububasha; uko Abakozi bashatswe bakanashyirwa mu myanya, amadosiye y’abakozi; gahunda y’amahugurwa y’abakozi;uburyo abakozi bitabira umurimo; uko Sitati Rusange igenga Abakozi ba Leta yubahirizwa, harebwa ibijyanye  n’indahiro, ihagarikwa ry’agateganyo, igeragezwa (probation), isuzumabushobozi, no kuzamurwa mu ntera n’amashimwe, kwimurwa (mutation), guhindurirwa umwanya (transfer), ibiruhuko, imishahara n’ibihano.  Hasuzumwe  iyubahirizwa ry’Iteka rya Perezida rigena uburyo bwo gutanga ibihano ku bakozi bakoze amakosa mu kazi. 

Mu  igenzura ryakozwe na  Komisiyo mu kwezi kwa cumi mu mwaka wa 2012,  ryari ryagaragaje ko  hari  Abakozi batarashyirwa mu myanya hakurikijwe imbonerahamwe y’imyanya y’imirimo yemejwe n’inzego zibifitiye ububasha, amapiganwa yose yari yarakoreshejwe  nta raporo yari yarashyikirijwe Komisiyo kugirango izisuzume, n’amadosiye y’Abakozi atujuje ibisabwa.

Mu ingenzura ryakozwe uyu mwaka  mu kwezi kwa cyenda 2016, ku karere ka Gisagara gafite imirenge cumi n‘itatu  bafite imbonerahamwe y’imyanya y’imirimo  yagenewe abakozi 285 yemejwe na MIFOTRA nk’uko amategeko abiteganya, ku bijyanye no gushaka abakozi mu buryo bukurikije amategeko, Komisiyo yasuzumye raporo eshanu (5)  z’amapiganwa yakoreshejwe kuva mu mwaka wa 2013 kugeza ubu, izo raporo zikaba zarashyikirijwe Komisiyo irazisesengura  ikazitangaho imyanzuro .

Amadosiye yose y’abakozi b’Akarere ka Gisagara yarasuzumwe, harebwa niba yujuje ibisabwa abakozi ba Leta bari mu kazi. Aho byagaragaye ko hari ibyangombwa bimwe na bimwe bitagaragara mu madosiye  y’Abakozi, Komisiyo yagiye inama ko bishakwa bigashyirwamo amadosiye akuzuzwa.

Ku bijyanye n’uko Sitati Rusange igenga Abakozi ba Leta yubahirizwa, harebwe ibijyanye  n’indahiro aho  Komisiyo yasanze byubahirizwa,  isuzumabushobozi ry’Abakozi no kuzamurwa mu Ntera birakorwa. Ibijyanye n‘ iyubahirizwa ry’Iteka rya Perezida rigena uburyo bwo gutanga ibihano ku bakozi bakoze amakosa mu kazi Komisiyo yasanze ibihano byatanzwe mu karere ka Gisagara byarubahirije amategeko.

Abakozi ba Komisiyo baganiza Ubuyobozi bw’Akarere ibyavuye mu igenzura

Mu kiganiro ubuyobozi bw'Akarere bwagiranye na Komisiyo  bwijeje ko  inama zatanzwe na Komisiyo zizashyirwa mu bikorwa mu gihe cyavuba, bityo amategeko ajyanye no gushaka no gucunga bakozi akarushaho kubahirizwa.

Alice NAMBAJE

PRCO/PSC