Kuva ku itariki ya 28/10//2024 kugeza ku itariki ya 08/11/2024, Itsinda rya Komisiyo y’Igihugu ishinzwe Abakozi ba Leta ryakoze igenzura mu Turere twa:  Nyamagabe, Ruhango na Kamonyi  hagamijwe gusuzuma niba Abakozi b’utwo Turere  barashatswe kandi bacungwa mu buryo bwubahirije amategeko no gusuzuma niba imyitwarire mbonezamurimo no gukora kinyamwuga mu bakozi yubahirizwa. 

Umuyobozi w'Akarere ka Kamonyi Dr. NAHAYO Sylvere, Umunyamabanga Nshingwabikorwa w'Akarere ka Ruhango Bwana MBABAZI MUHOZA Louis n’Umuyobozi w’Akarere ka Nyamagabe Bwana NIYOMWUNGERI Hildebrand bashimiye Komisiyo uruhare rukomeye ikomeje kugaragaza mu micungire myiza y'abakozi no guteza imbere imyitwarire mbonezamurimo mu Bakozi ba Leta. 

Komisiyo kandi yatanze ikiganiro ku myitwarire mbonezamurimo no gukora kinyamwuga ku Bakozi ba Leta muri utwo turere, kitabiriwe n'abakozi b'Uturere b'ibyiciro bitandukanye. Abakozi butwo Turere bongera kwibutswa imyitwarire mbonezamurimo ikwiye kuranga Umukozi wa Leta, Muri icyo kiganiro hagarutswe ku makosa akorwa n’abakozi ba Leta n’ingaruka ziterwa no gufata ibyemezo bitubahirije amategeko, ingaruka zo kudakora kinyamwuga; indangagaciro z’umwuga n’imyitwarire mbonezamurimo bisabwa Umukozi wa Leta wese hagamijwe guteza imbere imitangire myiza ya serivisi, gushyira umuturage ku isonga no kwihutisha iterambere ry’Igihugu.

Hasozwa iki gikorwa Umunyamabanga Nshingwabikorwa wa Komisiyo Madamu Angelina MUGANZA n'Umuyobozi w'Ungirije w'Inama y'Abakomiseri Madamu KANAKUZE Jeanne d'Arc bashimiye Ubuyobozi bw'utwo Turere ku mikoranire n'imikorere myiza banashishikariza abakozi bose kumenya no gusobanukirwa indangagaciro z’umwuga n’imyitwarire mbonezamurimo bikwiye kubaranga bikabafasha kurangiza neza inshingano bashinzwe bikihutisha iterambere ry’Igihugu.