Ku wa 26 Mutarama 2023 Komisiyo y’Igihugu ishinzwe Abakozi ba Leta yagiranye ikiganiro n’Ubuyobozi bw’Ikigo cy’Igihugu gishinzwe Indangamuntu, hagamijwe kurebera hamwe uburyo bwo kwimakaza imicungire y’abakozi no guteza imbere imyitwarire mbonezamurimo mu Nzego za Leta. Ikiganiro  kitabiriwe n’Umuyobozi Mukuru w’Ikigo cy’Igihugu gishinzwe Indangamuntu, abakozi bafite mu nshingano imicungire y’abakozi n’abagize akanama gashinzwe gukurikirana amakosa yo mu rwego rw’akazi (Disciplinary Committee) naho ku ruhande rwa Komisiyo hari Umunyamabanga Nshingwabikorwa n’Abakozi batanu ba Komisiyo.

Umuyobozi Mukuru w’Ikigo cy’Igihugu gishinzwe Indangamuntu Madamu MUKESHA Josephine, yahaye ikaze abitabiriye ikiganiro yakira Umunyamabanga Nshingwabikorwa wa Komisiyo y’Igihugu ishinzwe Abakozi ba Leta ndetse n’abitabiriye ikiganiro bose muri rusange.

Umunyamabanga Nshingwabikorwa wa Komisiyo Madamu  Angelina  MUGANZA yashimiye Ubuyobozi bw’Ikigo cy’Igihugu gishinzwe Indangamuntu, ku mwanya bwageneye Komisiyo ndetse n’imikoranire myiza hagati y’Ubuyobozi ku Nzego zombi, amenyesha abitabiriye ikiganiro ko guteza imbere imyitwarire mbonezamurimo ari inshingano nshya Komisiyo yahawe bityo Abakozi ba Leta bose bakaba basabwa kumenya no gusobanukirwa indangagaciro z’umwuga n’imyitwarire mbonezamurimo bikwiye kubaranga bikabafasha kurangiza neza inshingano bashinzwe. 

Umukozi wa Komisiyo Madamu UZAYISENGA Seraphine yatanze ikiganiro cyagarutse ku gushaka no gucunga Abakozi ba Leta, no guteza imbere imyitwarire mbonezamurimo no gukora kinyamwuga mu Bakozi ba Leta.

Mu buryo burambuye  hagarutswe ku mategeko ajyanye no gushaka no gucunga abakozi ba Leta, hamwe n’ingaruka ziterwa no gufata ibyemezo bitubahirije, urugendo rwo guteza imbere imyitwarire mbonezamurimo mu bakozi ba Leta, ingaruka zo kudakora kinyamwuga, indangagaciro z’imyitwarire mbonezamurimo zisabwa ku bakozi ba Leta bose hagamijwe kwihutisha iterambere ry’Igihugu, kwimakaza ihame ryo gushyira umuturage ku isonga.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta, yijeje Ubuyobozi bw’Ikigo cy’Igihugu gishinzwe Indangamuntu ko bazakomeza gufatanya mu guteza imbere imicungire y’abakozi no gukora kinyamwuga, yibutsa kujya hubahirizwa amategeko ajyanye n’imicungire y’abakozi  cyane cyane uburyo bwo gukurikirana umukozi wakoze amakosa no kubika ibimenyetso by’ikosa mu rwego rwo kwirinda imanza zatezwa nuko hafashwe icyemezo ariko ibimenyetso bikabura bigatuma umukozi ajya mu nkiko bigateza Leta igihombo.

Umuyobozi Mukuru w’Ikigo cy’Igihugu gishinzwe Indangamuntu, yashimiye Ubuyobozi bwa Komisiyo y’Igihugu ishinzwe Abakozi ba Leta ikiganiro kiza yabagejejeho ayizeza ubufatanye no kugisha inama ku bijyanye n’imicungire y’abakozi no gukomeza gutanga ibiganiro ku myitwarire mbonezamurimo no gukora kinyamwuga no kugeza raporo y’ibyo biganiro kuri Komisiyo buri gihembwe.