Inama nyunguranabitekerezo ngarukamwaka Komisiyo ishinzwe Abakozi ba Leta  igirana   n’Inzego za Leta, zitegurwa mu rwego rwo kwimakaza ihame ry’imiyoborere myiza.  Ku itariki ya 10/5/2016, Komisiyo  yagiranye iyi nama n’Abayobozi b’Umujyi wa Kigali n’ab’uturere tuwugize, Abayobozi b’Ibitaro byo mu turere tugize Umujyi wa Kigali, Abayobozi bafite mu nshingano imicungire y’abakozi ku Mujyi wa Kigali no mu turere tuwugize n’Abajyanama mu by’amategeko ndetse na Perezida w’Urukiko Rukuru na Perezida w’Urukiko Rwisumbuye rwa Nyarugenge.

Komisiyo yagejeje ku  bitabiriye inama bimwe mu bikorwa yakoze birimo  isesengura n’ ikigereranyo  ku gihombo Leta yatejwe  n’Abayobozi bafashe ibyemezo bidakurikije amategeko mu micungire y’Abakozi ba Leta, ibibazo byagaragaye mu bujurire  bwagejejwe kuri Komisiyo, igenzura ryakozwe mu bitaro ku micungire y’Abakozi n’imitangire ya serivisi, byakozwe mu mwaka  wa 2014-2015.

Isesengura ku gihombo  Leta  yatejwe n’imicungire y’abakozi mu buryo butubahirije amategeko mu  Mujyi wa Kigali ryagaragaje ko kuva  mu mwaka wa 2009 kugera  mu mwaka wa 2012, Leta yahombye miliyoni cumi n’ebyiri  n’ibihumbi magana arindwi na mirongo itandatu na bitatu n’ijana na cumi n’umunani y’u Rwanda (12,763,118Frw), kuva mu mwaka  2012 kugera mu mwaka wa 2015 Leta yahombye miliyoni mirongo itatu  n’eshatu n’ibihumbi magana atatu na mirongo ine n’ijana na makumyabiri na rimwe y’u Rwanda (33,340,121Frw).

Ku bijyanye n’ubujurire bwagejejwe kuri Komisiyo mu mwaka wa 2014-2015, abitabiriye inama basobaniriwe ko ahanini ubwo bujurire bwatewe no kutishimira ibyavuye mu mapiganwa, kudashyirwa mu umwanya yatsindiye, kwimurirwa ahandi, kuzamurwa mu Ntera no  kwirukanwa burundu.

Abitabiriye inama  bamaze kugaragarizwa  ibyateye ubujurire Komisiyo yakiriye, ibikwiye kunozwa mu mitangire ya serivisi  mu bitaro,  igihombo Leta yatejwe n’inzego zafashe ibyemezo bidakurikije amategeko,  bafashe ingamba ko Inzego za Leta zizakoresha amapiganwa zizajya zishyikiriza raporo Komisiyo, kubahiriza amategeko ajyanye no gushaka no gucunga Abakozi ba Leta hagamijwe gukumira ikintu cyose cyashora Leta mu manza  ziyiviramo igihombo.

Alice NAMBAJE/PR&CO