Kuri uyu wa 25 Werurwe 2021, Komisiyo y’Igihugu ishinzwe Abakozi ba Leta yagiranye inama nyunguranabitekerezo n’Intara y’Amajyepfo, ikaba yabaye hifashishijwe uburyo bw’ikoranabuhanga rya Webex mu rwego rwo kubahiriza ingamba zo kwirinda icyorezo cya Corona-Virusi cyugarije Isi n’Igihugu cyacu cy’u Rwanda.

Iyi nama ngarukamwaka ibaye ku nshuro ya 10 ikaba yari  igamije kugaragaza isura y’Intara  ku bijyanye n‘Imiterere y’ibibazo bikigaragara mu mitangire y’akazi n’imicungire y’abakozi ba Leta, gushishikariza abakozi ba Leta kurangwa n’imyitwarire mbonezamurimo no gufata ingamba zigamije kurushaho kunoza imicungire y’abakozi ba Leta.

Mu ijambo ry’ikaze, Umunyamabanga Nshingwabikorwa wa Komisiyo y’Igihugu ishinzwe Abakozi ba Leta, Madamu Angelina MUGANZA yibukije abitabiriye inama amavu n’amavuko n’ inshingano ya Komisiyo. Yagize ati “Itegeko Nshinga rya Repubulika y’u Rwanda ryo mu 2003 nk’uko ryavugururewe muri 2015 ryateganyije ko hajyaho Komisiyo yigenga igamije kureba ko inzego za leta zose zishaka abakozi , zikabacunga hakurikijwe Politike ,amategeko n’amabwiriza ari ho.Ibyo byose byari bigamije ko abanyarwanda bose bahabwa amahirwe angana kandi n’inzego za Leta zikabona abakozi bakwiye bazifasha kuzuza inshingano ziba zahawe. Komisiyo rero ikaba yaratangiye gushyira mu bikorwa inshingano zayo mu mwaka wa 2008, nyuma y’itegeko riyishyiraho ryo mu 2007.’

Yavuze ko inama nyunguranabitekerezo zafashije mu gukemura bimwe mu bibazobyagaragaraga mu mitangire y’akazi ka Leta n’imicungire y’abakozi mu nzego z’ibanze.

Umuyobozi w’Intara y’Amajyepfo , Madamu Alice KAYITESI atangiza inama ku mugaragaro, yashimiye Komisiyo kuba yarateguye iyi nama , avuga ko ibafasha cyane by’umwihariko Uturere avuga ko habamo ibyashobora guteza uru rwego ibibazo ,bikaba byakosoka hakiri kare ariko n’imyanzuro ifatirwa muri iyi nama ifasha mu kunoza imicungire y’abakozi no gushaka ibisubizo by’imbogamizi zigihari.

Mu bijyanye no gusuzuma uko imyanzuro y’inama nyunguranabitekerezo yabaye mu mwaka wa 2019/2020 yashyizwe mu bikorwa, hagaragajwe ko mu myanzuro 10 yari yafashwe, 7 muri yo yashyizwe mu bikorwa , umwanzuro 1 washyizwe mu bikorwa igice  naho imyanzuro 2 iracyakurikiranwa.

Abitabiriye inama bunguranye ibitekerezo biganisha ku gushakira hamwe ibisubizo by’imbogamizi zigihari hagamijwe kunoza imicungire y’abakozi.

Umuyobozi w’Akarere ka Muhanga, Madamu KAYITARE Jacqueline yavuze ko ibiganiro bitangwa mu nama ari ingirakamaro kuko bifasha gukumira amakosa ashobora kubaho, ashima Komisiyo ko iba hafi Akarere ka MUHANGA iyo kayiyambaje. Avuga ko biyemeje gushyira mu bikorwa ibyo amategeko ateganya bijyanye n’imicungire y’abakozi.

Umuyobozi w’ agateganyo w’akarere ka Kamonyi,  Bwana TUYIZERE Thaddée yavuze ko hari intambwe ishimishije yatewe mu bijyanye n’imicungire y’abakozi ugereranyije n’imyaka yashize.

Yasabye ko hakorwa ubuvugizi hakoroshywa uburyo abarimu bimurwa kuko hari abarimu bagaragaje ikibazo cyo kuba bakorera kure y’ingo zabo bikabagora. Yagize ati’ hari uburyo ibizamini byakorwaga, umwarimu akaba yizeye ko niba atuye Kamonyi ari ho azabona akazi, ariko ubu  ashobora gusanga yahawe akazi I Rusizi, cyangwa uwa Rusizi akaza Kamonyi. Ariko muri sitati yihariye ibagenga n’uburyo bwo kwimuka ava mu Karere ajya mu kandi usanga bigoranye cyane wahuza n’umushahara bakorera n’uko gukorera kure, ukabona icyiza ari ukubafasha kuba nibura kwimuka byakoroha igihe umwanya ubonetse mu Karere kamwegereye.Iyo duhuye n’abarimu bagenda babigaragaza’.

Umuyobozi ushinzwe ubugenzuzi bw’inzego z’ibanze muri MINALOC, Bwana Angelo SEMWAGA yashimye intambwe nziza yatewe mu micungire y’abakozi mu ntara y’Amajyepfo bigaragazwa n’uko nta Karere kaciwe amafaranga mu nkiko biturutse ku byemezo bifatirwa abakozi bitubahirije amategeko. Yasabye Intara y’Amajyepfo n’Uturere tuyigize kutirara ahubwo bagakemura ibibazo bigihari, ibyo bikaba byagerwaho binyuze mu kongerera ubushobozi abakozi bashinzwe gucunga abandi no kujya inama kenshi na Komisiyo y’Igihugu Ishinzwe Abakozi ba Leta.

Abayobozi batandukanye bagarutse ku kibazo cy’imyanya y’imirimo itarimo abakozi bikaba bishobora gutuma umusaruro uba mucye.

Umukozi muri MIFOTRA, ushinzwe kugenzura imitangire ya Serivisi mu nzego za Leta Bwana BIKORIMANA Janvier, yavuze ko hazabaho gahunda yo kumenyekanisha amategeko mashya  agenga imicungire y’abakozi ba  Leta, avuga ko mu rwego rwo koroshya imitangire ya Serivisi inzego zeguriwe ibyemezo bijyanye no guhana abakozi bakoze amakosa, aho bitakiri mu itegeko kugisha inama MIFOTRA mu gihe cyo gufatira umukozi icyemezo. Yongeyeho ko gushaka no gushyira abakozi mu myanya byazitiwe n’icyorezo cya Covid- 19, gusa avuga ko harimo kuvugururwa sisitemu y’ikoranabuhanga rya e-Recruitment ryifashishwa mu gushaka abakozi  ikazaza ikemura ibibazo byinshi byagaragajwe.

Mu gusoza inama, Umunyamabanga Nshingwabikorwa wa Komisiyo, Madamu Angelina MUGANZA, yashimiye abitabiriye inama ibitekerezo byiza batanze, avuga ko kurangwa n’imyitwarire mbonezamurimo biri mu ngamba zo kwihutisha akazi. Yasabye abayobozi bitabiriye inama gukomeza imikoranire myiza irimo kujya inama mu rwego rwo kurushaho kunoza imicungire y’abakozi.

 Umuyobozi w’Intara y’Amajyepfo, Madamu Alice KAYITESI yijeje Komisiyo gukomeza imikoranire myiza no gukomeza kubahiriza amategeko agenga imicungire y’abakozi.

Yagize ati “Uru rugamba ni urwacu kandi ikigambiriwe nuko abakozi ba Leta bakora neza bagatanga umusaruro, kubahana ni amahitamo ya nyuma( option Z)’.

Iyi nama kandi yitabiriwe n’abantu bagera kuri 56 barimo Abayobozi n’abakozi ba Komisiyo y’Igihugu ishinzwe Abakozi ba Leta, Umuyobozi uhagarariye Minisiteri y’Ubutegetsi bw’Igihugu, Umuyobozi uhagarariye Minisiteri y’Abakozi ba Leta n’Umurimo, Abayobozi n’abakozi b’Intara y’Amajyepfo, Abayobozi b’Uterere tugize Intara y’Amajyepfo, abajyanama mu by’amategeko ,Abakozi bashinzwe imicungire y’abakozi n’Umunyamabanga Nshingwabikorwa uhagarariye abandi muri buri Karere.

Antoine SHYAKA

Public Relations and Communication Officer/NPSC