Kuri uyu wa 16 Werurwe 2021 , Komisiyo y’Igihugu ishinzwe Abakozi ba Leta yagiranye inama nyunguranabitekerezo n’Intara y’Iburasirazuba ,ikaba yabaye hifashishijwe uburyo bw’ikoranabuhanga rya Webex mu rwego rwo kubahiriza ingamba zo kwirinda icyorezo cya Corona-Virusi cyugarije Isi n’Igihugu cyacu cy’u Rwanda.

Iyi ni inama ngarukamwaka ibaye ku nshuro ya 10. igamije kugaragaza isura y’Intara ijyanye n‘Imimiterere y’ibibazo bikigaragara mu mitangire y’akazi n’imicungire y’abakozi ba Leta, gushishikariza abakozi ba Leta kurangwa n’imyitwarire mbonezamurimo no gufata ingamba zigamije kurushaho kunoza imicungire y’abakozi ba Leta.

Mu ijambo ry’ikaze , Madamu Angelina MUGANZA,Umunyambanga Nshingwabikorwa wa Komisiyo y’Igihugu ishinzwe Abakozi ba Leta yashimiye abayobozi n’abakozi bitabiriye inama abakangurira kwita ku myitwarire mbonezamirimo ( Professional comduct) bagakora kinyamuga.

Umunyamabanga Nshingwabikorwa w’Intara y’Iburasirazuba Madamu Dr. NYIRAHABIMANA Jeanne atangiza inama yibukije ko  imicungire y’abakozi ifitanye isano ya hafi n’imikoreshereze y’umutungo w’igihugu. Yagize ati “Imicungire y’abakozi ifite aho ihuriye n’imikoreshereze y’imari ya Leta kuko abakozi ba Leta ari bo bakoresha imari ya Leta’.

Mu kiganiro kigaragaza uburyo imyanzuro y’inama nyunguranabitekerezo yahuje Komisiyo n’Intara y’Iburasirazuba mu mwaka wa 2018/2019 yashyizwe mu bikorwa, Dr. NYIRAHABIMANA Jeanne yagaragaje ko mu myanzuro ine (4) yari yafashwe, 3  yashyizwe mu bikorwa naho umwe (1) uracyakurikiranwa.

Benshi mu bayobozi b’Uturere batanze ibitekerezo bashimye imikoranire isigaye iranga Komisiyo n’Inzego z’ibanze. Umuyobozi w’Akarere ka Kayonza , Bwana MURENZI Jean Claude yavuze ko imikoranire hagati ya Komisiyo y’Igihugu ishinzwe Abakozi ba Leta n’Akarere ayobora igenda irushaho kuba myiza ugereranyije na mbere ubwo bafataga Komisiyo nkaho ishyigikira abakozi b’abanyamakosa ariko ubu ikaba igira inama Akarere ku bijyanye n’imicungire y’abakozi igihe kayiyambaje.

Umuyobozi w’Akarere ka Rwamagana , Bwana MBONYUMUVUNYI Radjab we yavuze ko yashimiye Komisiyo ko ibagira inama zituma Akarere kadashorwa mu manza zashoboraga guteza Leta mu gihombo.

Umuyobozi Mukuru ushinzwe Ubugenzuzi bw’Inzego z’Ibanze muri Minisiteri y’Ubutegetsi bw’Igihugu, Bwana Angelo SEMWAGA yasabye ko ibiganiro nk’ibi byajya biba kenshi kugira ngo bifashe inzego z’ibanze mu micungire y’abakozi dore ko ari nazo nzego zigira umubare munini w’abakozi ba Leta. Gusa yanagiriye inama Abayobozi b’Inzego z’Ibanze kujya zivugurura dosiye z’abakozi kuko hari igihe Urwego rushaka kwirukana umukozi ruvuga ko yananiranye , nyamara wajya kureba dosiye ye ugasanga nta bihano yigeze ahabwa ndetse n’amanota y’isuzumabushobozi agaragaza ko akora neza.

Avuga ko muri icyo gihe uwo mukozi umwirukanye akakurega mu mategeko yagutsinda kuko utubahirije amategeko akurikizwa mu guhana umukozi.

Bwana BIKORIMANA Janvier, Umukozi ushinzwe kugenzura imitangire ya Service za Leta muri Minisiteri y’Abakozi ba Leta n’Umurimo, yibukije abitabiriye inama ko ibyemezo bifatirwa abakozi ba Leta byeguriwe inzego ubwazo byavuye mu itegeko ko bagisha inama MIFOTRA nk’uko byahoze, ashishikariza abayobozi gukorana bya hafi n’abajyanama b’inzego mu by’abategeko kugira ngo ibyemezo bifatwa bibe bikurikije amategeko.

Ibitekerezo bitandukanye byibanze ku mahugurwa yo kwimenyereza akazi (induction course); isuzuma ry’abakozi,imishakire y’abakozi, gukora ikinyamwuga n’amahugurwa ajyanye n’imicungire y’abakozi.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta, Madamu Angelina MUGANZA agaruka ku bitekerezo byatanzwe, yavuze ko koko wasangaga abakozi bakora amakosa bagahanwa ariko barega Leta bakayitsinda kuko wasangaga inzego zitarakurikije amategeko mu gihe cyo kubahana ariko ubu bikaba bigenda bigabanuka.

Naho ku bijyanye no kuba inama n’inzego z’ibanze yajya iba inshuro nyinshi mu rwego kubaba hafi mu micungire y’abakozi benshi bafite, yavuze ko Komisiyo na MINALOC bazajya  baganira ku bibazo byagaragaye bijyanye n’imicungire y’abakozi kugira ngo bihabwe umurongo wo kubikemura hakiri kare, bikaba byanagabanya umubare w’Uturere tugaragara muri raporo y’umwaka ya Komisiyo tutarubahirije imyanzuro tuba twahawe.

Mu gusoza inama, Umunyamabanga Nshingwabikorwa w’Intara y’Iburasirazuba  Dr. NYIRAHABIMANA Jeanne yashimiye  Komisiyo y’Igihugu ishinzwe Abakozi ba Leta kuba yarateguye iyi nama nyunguranabitekerezo, avuga ko ari urubuga rwiza rwo kuganiriraho amahame n’amategeko agenga imicungire y’Abakozi ba Leta hagamijwe kurushaho kuyinoza.

Iyi nama yitabiriwe n’abantu bagera kuri 60 barimo Abayobozi n’abakozi ba Komisiyo y’Igihugu ishinzwe Abakozi ba Leta, Umuyobozi uhagarariye Minisiteri y’Ubutegetsi bw’Igihugu, Umuyobozi Uhagarariye Minisiteri y’Abakozi ba Leta n’Umurimo, Abayobozi n’abakozi b’Intara y’Iburasirazuba, Abayobozi b’Uterere tugize Intara y’Iburasirazuba, abajyanama mu by’amategeko ,Abakozi bashinzwe imicungire y’abakozi n’Umunyamabanga Nshingwabikorwa uhagarariye abandi muri buri Karere.

Antoine SHYAKA

Public Relations and Communication Officer/ NPSC