Kuri uyu wa 16 Kamena 2020, Komisiyo y’Igihugu ishinzwe Abakozi ba Leta yagiranye inama nyunguranabitekerezo n’Intara y’Iburengerazuba n’Uturere tuyigize hagamijwe kunoza imucungire y’Abakozi ba Leta.

Iyi nama yitabiriwe n’Abayobozi n’abakozi bafite aho bahuriye n’imicungire y’abakozi haba ku rwego rw’Intara no ku rwego rw’Uturere.

Mu gutangiza iyi nama, Madamu Angelina MUGANZA Umunyamabanga Nshingwabikorwa wa Komisiyo  yihanganishije Uturere two muri iyi Ntara tukigaragaramo umubare munini w’ubwandu bushya bw’icyorezo cya  Koronavirusi        (Covid-19)  ari two Rusizi na Rubavu, abashishikariza gukomeza kubahiriza amabwiriza yo kukirinda.

Umunyamabanga Nshingwabikorwa w’Intara y’Iburengerazuba , Madamu UWAMBAJEMARIYA Florence  yatanze ikiganiro ku ishyirwa mu bikorwa ry’imyanzuro y’inama nyunguranabitekerezo y’umwaka ushize wa 2018/2019.

Mu kiganiro kigaragaza uko imicungire y’abakozi ihagaze mu Gihugu cyose no mu Ntara y’Iburengerazuba by’umwihariko cyatanzwe na  Bwana NKURUNZIZA Fernand, Umuyobozi w’ishami rishinzwe Ubujyanama no Gukemura amakimbirane muri Komisiyo, cyagarutse ku nshingano za Komisiyo, Ubujurire Komisiyo yakiriye buturutse mu Ntara y’Iburengerazuba ikabusesengura igasanga bufite ishingiro n’imyanzuro yabufasheho.

Ubu bujururire Komisiyo yakiriye igasanga bufite ishingiro nibwo bwagarutsweho cyane mu biganiro  aho Komisiyo yagaragaje imyanzuro yabufasheho , imyinshi ikaba itarashyizwe mu bikorwa hakaba n’iyashyizwe mu bikorwa ariko Komisiyo ntihabwe raporo. Muri iki kiganiro hagaragajwe ko Ubujurire bufite ishingiro mu mwaka wa 2017/2018 bwari 26,5% naho muri 2018/2019 bukiyongera bukagera kuri 33,2%, ibi bikaba bigaragaza ko hakenewe kongerwa imbaraga mu kubahiriza amategeko agenga imicungire y’Abakozi ba Leta.

 Bamwe mu bitabiriye inama bavuze ko igihe gushaka no gushyira umukozi mu mwanya bitwara ari kinini, basaba ko cyagabanuka. Kuri iki kibazo Madamu Angelina MUGANZA, avuga ko mu gihe hagishakwa ikoranabuhanga ryatuma urutonde rw’abemerewe gukora ibizami rukorwa n’ikoranabuhanga (online shortlisting) ,Uturere dukwiye gushyiraho akanama gashinzwe gushaka abakozi (recruitment committee ) kazajya gakora urwo rutonde mu gihe gito.

Madamu UWAMBAJEMARIYA Florence yasabye ko ikoreshwa ry’urutonde rw’abatsinze ibizami rubikwa na Minisiteri y’Abakozi ba Leta n’Umurimo (MIFOTRA) rwarushaho gukoreshwa kugira ngo hatagira imyanya ibura abakozi igihe kirekire.

Mu gusoza inama, Madamu Angelina MUGANZA yasabye abitabiriye inama gushyira muri gahunda zabo ibiganiro ku micungire y’abakozi ,guhugura abakozi bafite aho bahuriye n’Imicungire y’Abakozi  anasaba Uturere kujya tumenyereza abakozi bashya mu kazi (induction).

Antoine SHYAKA

Public Relations and Communication Officer/ NPSC