Kuwa 04 Werurwe 2022, Komisiyo yagiranye inama na Njyanama, Komite Nyobozi y’Akarere, n’Abagize akanama gashinzwe gukurikirana amakosa mu Karere ka Muhanga. Iyo nama yari igamije kuganira ku micungire y’abakozi no guteza imbere imyitwarire mbonezamurimo mu bakozi ba Leta.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta, Madamu Angelina MUGANZA yashimiye abitabiriye inama , avuga ko iyi nama igamije gufatira hamwe ingamba z’uburyo Leta yagira abakozi beza,buzuza inshingano zabo.

Komisiyo yatanze ibiganiro bibiri: icya mbere cyatanzwe na Bwana MUPENZI BIRORI Ezechiel, umukozi mu wa Komisiyo mu ishami rishinzwe kugenzura iyubahirizwa ry’amategeko agenga imicungire y’abakozi, yagaragaje amategeko agenga imicungire y’abakozi, amakosa akunze gukorwa n’abakoresha, akorwa n’abakozi, ingaruka ayo makosa ateza n’inama Komisiyo itanga mu rwego rwo kwirinda no gukumira ayo makosa.

Naho mu kiganiro cya kabiri cyatanzwe na Bwana MUSABYIMANA Jean Damascène  yagaragaje ibimaze gukorwa bijyanye no guteza imbere imyitwarire mbonezamurimo mu bakozi ba Leta n’amahame ngengamyitwarire akwiye kuranga abakozi ba Leta.

Umuyobozi w’Akarere ka Muhanga, Madamu  KAYITARE Jacqueline yavuze ko ibi biganiro byari bikenewe ndetse ko bikwiye guhoraho. Yavuze ko amakosa akorwa mu micungire y’abakozi ashingiye ku bumenyi bucye bw’amategeko agenga imicungire yabo.

Yagize ati:” Amategeko ntabwo abuze ndetse nta muntu udafite ubushobozi bwo kuyasoma ngo anayasesengure, ahubwo  usanga abakozi batayasoma, ntibamenye inshingano, ntibamenye uburenganzira  bigateza impaka n’imanza”.

Yavuze ko inzego z’ibanze zifite umwihariko mu gushaka abakozi. ‘Ntabwo dushobora kubona tubura umukozi ngo tumushake, dusaba uburenganzira bwo kumushaka kandi dufite ingengo y’imari , dufite n’icyuho mu mitangire ya Serivisi yagakoze, tuzitirwa no gusanga inshingano zo gushaka abakozi zitari mu bushobozi bwacu. Ibyo bigira ingaruka ku mitangire ya serivisi no ku bakozi bahari kuko usanga umukozi umwe ashobora gukora inshingano ebyiri cyangwa eshatu.’

Umuyobozi w’Akarere yavuze ko mu micungire y’abarimu harimo imbogamizi kuko baba ari abakozi b’Akarere ariko  katabagenzura bakaba bagenzurwa na MINEDUC  ariko ikibazo cyavuka bikabazwa Inzego z’ibanze. ‘iyo umukozi azi ko hari urundi rwego rumenya ibye kurusha ku Karere, iyo atari umukozi mwiza usanga bimwica mu myumvire kuko haza akajagari mu kumukurikirana kuko tumuhererekanya’.

Yanavuze ko hari umuco ugenda ukura mu bakozi ba Leta aho umukozi amara igihe kinini yegeranya ibimenyetso yiteze ko hazabaho imanza. Ygize ati:’umukozi  atangira akazi agatangira kwiga urubanza azaburana igihe bazamubaza inshingano.Bavuga ko mu bikorera na ONG bakoresha cyane, bigasa nkaho Leta ari ubuhungiro bw’ushaka gukora uko abonye’.

Umuyobozi Mukuru w’Ibitaro bya Kabgayi, Dr. MUVUNYI Jean Baptiste yagaragaje ikibazo cyo kuba imbonerahamwe z’ibitaro zidahura neza  na serivisi z’ubuvuzi zihatangirwa asaba ko ibigo by’ubuvuzi byajya bihabwa umwihariko mu gushaka abakozi bitewe na serivisi batanga. Yavuze ko hari ibigo nderabuzima bifite imbangukiragutabara( ambulances) ariko bidafite abashoferi kandi n’ibitaro bidafite abahagije.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta yavuze ko hazakorwa ubuvugizi, MINISANTE ikongera gusuzuma imiterere y’imbonerahamwe z’imyanya y’imirimo mu Bitaro.

Antoine SHYAKA,

Public Relations and Communication Officer/NPSC