Ku wa 06/09/2022 Komisiyo y’Igihugu ishinzwe Abakozi ba Leta yaganirije Abakozi ba IPRC Kitabi ku micungire y’abakozi no guteza imbere imyitwarire mbonezamurimo mu Bakozi ba Leta.

Ibiganiro byitabiriwe n’Abakozi bafite imicungire y’abakozi mu nshingano n’abagize Akanama gashinzwe gukurikirana amakosa yo mu rwego rw’akazi. Ni ibiganiro byahujwe n’igikorwa cyo gusoza igenzura ry’ishyirwa mu myanya ry’abakozi nyuma y’ivugurura ry’Inzego z’Imirimo ya Leta mu mwaka wa 2020. Iryo genzura ryari rimaze iminsi itanu rikorwa n’abakozi ba Komisiyo.

Ikiganiro cya mbere cyatanzwe na Bwana MBONIGABA Etienne, Umuyobozi w’Agateganyo w’Ishami rishinzwe Guteza imbere imyitwarire mbonezamurimo no Kugenzura imicungire y’Abakozi, agaragaza amakosa akunda gukorwa mu micungire y’Abakozi ba Leta n’ingaruka zayo.

Ikiganiro cya kabiri cyatanzwe na Bwana Serge UWIZEYIMANA, Umukozi ushinzwe guteza imbere imyitwarire mbonezamurimo no kugenzura imicungire y’abakozi, cyagarutse ku bimaze gukorwa mu guteza imbere imyitwarire mbonezamurimo n’indangagaciro zikwiriye kuranga Abakozi ba Leta.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta, Madamu Angelina MUGANZA yavuze ko buri mukozi wa Leta akwiye kwibera Umuyobozi akirinda gukorera ku jisho kugira ngo akazi gakorwe neza kandi ku gihe.

Umuyobozi wungirije ushinzwe Imyigishirize n’Amahugurwa muri IPRC KITABI, Dr. NSENGUMUREMYI Concorde yashimiye Komisiyo ku biganiro yabateguriye, avuga ko bungukiyemo byinshi bizabafasha kunoza imicungire y’abakozi.