Kuwa 17 Kanama 2022, Komisiyo y’Igihugu Ishinzwe Abakozi ba Leta yagiranye ibiganiro n’Ubuyobozi bw’Akarere ka Nyamagabe hagamijwe guteza imbere imyitwarire mbonezamurimo no kunoza imicungire y’Abakozi. Ibiganiro byitabiriwe n’abagize Inama Njyanama y’Akarere ka Nyamagabe, abagize Komite Nyobozi y’Akarere, Abayobozi b’amashami ku rwego rw’Akarere, Abakozi bashinzwe imicungire y’Abakozi mu Karere ka Nyamagabe, n’abagize Akanama gashinzwe gukurikirana amakosa ku rwego rw’Akarere.

Umuyobozi w’Inama Njyanama y’Akarere ka Nyamagabe, Madamu UWAMAHORO Clothilde yahaye ikaze abitabiriye ikiganiro yakira Umunyamabanga Nshingwabikorwa wa Komisiyo y’Igihugu ishinzwe Abakozi ba Leta hamwe n’intumwa yari ayoboye

Umuyobozi w’Akarere ka Nyamagabe, Bwana NIYOMWUNGERI Hildebrand nawe yahaye ikaze Umunyamabanga Nshingwabikorwa n’abakozi ba Komisiyo, abagize inama Njyanama y’Akarere ka Nyamagabe ndetse n’Abakozi b’Akarere muri rusange.

Nyuma yo guhabwa ikaze, Umunyamabannga Nshingwabikorwa wa Komisiyo  Madamu Angelina Muganza yashimiye Ubuyobozi bw’Akarere ka Nyamagabe ku mwanya bwageneye Komisiyo ndetse n’imikoranire myiza hagati y’Ubuyobozi bwa Komisiyo n’Ubuyobozi bw’Akarere, amenyesha abitabiriye ikiganiro ko bimwe biza kuganirwaho ari ibirebana no guteza imbere imyitwarire mbonezamurimo, inshingano nshya Komisiyo yahawe bityo Abakozi ba Leta bose bakaba basabwa kumenya no gusobanukirwa indangagaciro z’umwuga n’imyitwarire mbonezamurimo bikwiye kubaranga bikabafasha kurangiza neza inshingano bashinzwe. 

Ikiganiro cya mbere cyatanzwe na Bwana MUPENZI BIRORI Ezechiel, Umukozi wa Komisiyo ushinzwe iyubahirizwa ry’amategeko. Muri icyo Kiganiro  hagarutswe ku mategeko ajyanye no gushaka no gucunga Abakozi ba Leta, hamwe n’ingaruka ziterwa no gufata ibyemezo bitubahirije amategeko.

Ikiganiro cya kabiri  cyatanzwe na Bwana MUSABYIMANA Jean Damascene, Umukozi ushinzwe guteza imbere imyitwarire mbonezamurimo n’Igenzura ry’Imicungire y’abakozi. Abitabiriye ikiganiro basobanuriwe urugendo rwo guteza imbere imyitwarire mbonezamurimo mu bakozi ba Leta, ingaruka zo kudakora kinyamwuga, indangagaciro zo gukora kinyamwuga n’imyitwarire mbonezamurimo bisabwa ku Bakozi ba Leta bose hagamijwe kwihutisha iterambere ry’igihugu himakazwa ihame ryo gushyira umuturage ku isonga no kwihutisha iterambere ry’igihugu.

Nyuma y’ibyo biganiro, Abitabiriye inama bahawe umwanya wo gutanga ibitekerezo no kubaza ibibazo. Komisiyo yakiriye ibitekerezo byatanzwe kandi isubiza ibibazo byose byabajijwe hashingiwe ku biteganywa n’amategeko agenga imicungire y’abakozi.

Mu gusoza, Umuyamabanga Nshingwabikorwa wa Komisiyo yashimiye Ubuyobozi bw’Akarere ku mwanya bwageneye Komisiyo, abusaba kwihutisha gushyiraho Standards Operating Procedures ( SOPs) nk’uko byasabwe na Minisiteri y’Abakozi ba Leta n’Umurimo mu rwego rwo kunoza imitangire ya serivisi no gukora kinyamwuga, akomeza yizeza Akarere ka Nyamagabe ubufatanye mu bijyanye no guteza imbere imicungire y’abakozi no gukora kinyamwuga.

Umuyobozi w’Inama Njyanama y’Akarere ka Nyamagabe yashimiye Komisiyo ku kiganiro yabagejejeho anayizeza ko impanuro n’amasomo bungutse bigiye gutuma barushaho kwesa imihigo y’Akarere, asaba abakozi b’Akarere kurangwa n’indangagacio z’umwuga no gufata ibyemezo byubahirije amategeko  yaba ku bayobozi ndetse no ku bakozi bagakora inshingano zabo uko bikwiye ntibibe nka byabindi ngo karushya isaba buri wese kandi akemera kubazwa amakosa yakoze icyo umuntu atumva akaba yagisha inama Komisiyo aho gufata ibyemezo bidakwiye.

Antoine SHYAKA

Public Relations and Communication Officer/ NPSC