Ku wa 21 Nzeri 2022, Komisiyo y’Igihugu ishinzwe Abakozi ba Leta yagiranye inama nyunguranabitekerezo n’Inzego zo mu Butegetsi bwite bwa Leta hagamijwe kunoza imicungire y’abakozi muri izo nzego no guteza imbere imyitwarire mbonezamurimo y’Abakozi ba Leta.

Mu ijambi ry’ikaze, Umunyamabanga Nshingwabikorwa wa Komisiyo, Madamu Angelina MUGANZA, yashimiye abayitabiriye abibutsa ko ari inama ngarukamwaka igamije kubagaragariza ushusho rusange y’imicungire y’abakozi no gufatira hamwe ingamba zo kurushaho kuyinoza.

Iyi nama yatangijwe na Nyakubahwa Minisitiri w’Abakozi ba Leta n’Umurimo, Madamu RWANYINDO KAYIRANGWA Fanfan wari Umushyitsi Mukuru. Yibukije abitabiriye inama iby’ingenzi bikwiriye kwitabwaho mu kunoza imicungire y’abakozi ba Leta. Yagize ati: “Ndashaka kongera kwibutsa bimwe mu by’ingenzi bikwiye kurushaho kwitabwaho umunsi ku munsi: Gufata ibyemezo mu birebana n’imicungire y’abakozi hashingiwe ku nama z’abakozi bashinzwe amategeko mu kigo, hagamijwe kwirinda buri gihe gufata ibyemezo binyuranije n’amategeko, kuko biteza Leta igihombo kandi bikanasubiza inyuma urwego; Kubahiriza inzira n’ibihe mu gushaka no gucunga abakozi ba Leta no gukurikirana imicungire y’abakozi mu nzego dushinzwe, ahagaragaye imicungire itanoze hagafatwa ibyemezo hakiri kare kandi abakoze nabi bagahanwa nk’uko amategeko abiteganya”.

Ikiganiro kijyanye no kugaragaza ishyirwa mu bikorwa ry’imyanzuro yari yafashwe mu nama nyunguranabitekerezo yabaye kuwa 29/04/2021, cyatanzwe na Bwana MBONIGABA Etienne , Umuyobozi w’Agateganyo w’Ishami rishinzwe Guteza imbere imyitwarire mbonezamurimo no Kugenzura imicungire y’abakozi. Yagaragaje ko mu myanzuro 4 yari yafashwe,imyanzuro 3 yashyizwe mu bikorwa naho umwe ntiwashyirwa mu bikorwa.

Ikiganiro cya kabiri cyatanzwe n’Umuyobozi w’ishami rishinzwe kugenzura iyubahirizwa ry’amategeko agenga imicungire y’abakozi, Bwana NKURUNZIZA Fernand, yagaragaje amakosa akigaragara mu micungire y’abakozi ba Leta nk’uko Komisiyo yagiye ibibona mu bikorwa byayo bitandukanye birimo gusuzuma ubujurire bw’abakandida bashaka akazi, gusuzuma ubujurire bw’abakozi ba Leta, gusesengura igihombo Leta itezwa n’Ibyemezo bifatirwa abakozi bidakurikije amategeko no kugenzura imicungire y’abakozi.

Abitabiriye inama bunguranye ibitekerezo biganisha ku kunoza imicungire y’abakozi no gukosora amakosa akigaragara muri iyo serivisi. Ibibazo byabajijwe bijyanye n’imicungire y’abakozi byasubijwe na Komisiyo ifatanyije na MIFOTRA.

Inama yitabiriwe n’Abanyamabanga bahoraho bo muri za Minisiteri zose, Abayobozi Bakuru b’Inzego za Leta, Abanyamabanga Bakuru n’Abanyamabanga Nshingwabikorwa ba za Komisiyo.

Mu gusoza iyi nama, Nyakubahwa Minisitiri w’Abakozi ba Leta n’Umurimo  yasabye Abayobozi kubahiriza amategeko agenga imicungire y’abakozi ba Leta mu rwego rwo kwirinda gushora Leta mu manza ziyiteza igihombo.