Nyuma y’uko Komisiyo ikoze ikiganiro ku myitwarire mbonezamurimo muri MINECOFIN, Ku wa 18 Mutarama 2023, Komisiyo y’Igihugu ishinzwe Abakozi ba Leta yashoje igenzura yakoze muri Minisiteri y’Imari n’Igenamigambi kuva ku wa 09/01/2023 kugeza ku wa 13/01/2023. Igenzura ryari rigamije gusuzuma niba ishyirwa mu myanya ry’abakozi muri MINECOFIN ryarakozwe mu buryo bwubahirije amategeko nyuma y’ivugurura ry’inzego z’imirimo ya Leta mu mwaka wa 2020.

Iri genzura ryakozwe hashingiwe ku Mabwiriza ya Minisitiri w’Abakozi ba Leta n’Umurimo No 02 yo kuwa 07/12/2020 agena ishyirwa mu myanya ry’abakozi no gushaka Abakozi nyuma y’ivugurura ry’inzego z’imirimo ya Leta mu mwaka wa 2020.

Mu nama yo gusoza igenzura, Umuyobozi Mukuru ushinzwe Imirimo rusange muri MINECOFIN, Madamu INGABIRE Hakiba Marie Ange yahaye ikaze abakozi ba Komisiyo, ashimira Komisiyo imikoranire myiza.

Umuyobozi w’agateganyo w’ishami rishinzwe guteza imbere imyitwarire mbonezamurimo muri Komisiyo, Bwana MBONIGABA Etienne, yashimiye Ubuyobozi bwa MINECOFIN ku mikoranire myiza iranga impande zombi anagaragaza impamvu y’iryo genzura.

Komisiyo  yatanze ikiganiro kigaragaza ibyagenzuwe n’ibyavuye  mu igenzura.

Muri iri genzura hasuzumwe ibi bikurikira: Imbonerahamwe y’imyanya y’imirimo ya mbere na nyuma y’ivugurura;

• Raporo y’isuzumabushobozi (2017/2018 & 2018/2019);
• Ishyirwa mu myanya ry’abakozi mu gihe cy’ivugurura;
• Abakozi bashyizwe mu myanya by’agateganyo (acting);
• Imyanya yahinduriwe inyito, intera cyangwa ibisabwa;
• Dosiye z’abakozi bashyizwe mu myanya;
• Abakozi basezerewe.

Nyuma yo kuganira ku ntego n’ibyagenzuwe, abari mu nama bamenyeshejwe ko MINECOFIN izashyikirizwa umushinga wa raporo kugira ngo iwutangeho ibitekerezo mu gihe kitarenze iminsi 15 mbere y’uko hakorwa raporo ya burundu.

Mu gusoza, uhagarariye Komisiyo y’Igihugu ishinzwe Abakozi ba Leta yibukije ko imicungire myiza y’Abakozi ba Leta, imyitwarire mbonezamurimo iranga Abakozi ba Leta n’imikorere ya kinyamwuga ari inkingi z’iterambere ry’Igihugu byafasha kugera ku ntego u Rwanda rwihaye z’icyerekezo 2050.