Ku wa 13 Nyakanga 2023, Komisiyo y’Igihugu ishinzwe Abakozi ba Leta yashoje igenzura yakoze mu Kigo cy’Igihugu gishinzwe Imikurire y’Abana bato (NCDA) kuva ku wa 22/05/2023 kugeza ku wa 26/05/2023. Igenzura ryari rigamije gusuzuma niba ishyirwa mu myanya ry’abakozi muri NCDA ryarakozwe mu buryo bwubahirije amategeko nyuma y’ivugurura ry’inzego z’imirimo ya Leta mu mwaka wa 2020.

Iri genzura ryakozwe hashingiwe ku Mabwiriza ya Minisitiri w’Abakozi ba Leta n’Umurimo No 02 yo kuwa 07/12/2020 agena ishyirwa mu myanya ry’abakozi no gushaka Abakozi nyuma y’ivugurura ry’inzego z’imirimo ya Leta mu mwaka wa 2020.

Mu nama yo gusoza igenzura, Umuyobozi Mukuru w’Ikigo cy’Igihugu gishinzwe Imikurire y’Abana bato (NCDA) Madamu UMUTONI GATSINZI Nadine, yashimiye Komisiyo imikoranire myiza.

Komisiyo  yatanze ikiganiro kigaragaza ibyagenzuwe n’ibyavuye  mu igenzura.

Muri iri genzura hasuzumwe ibi bikurikira:

• Imbonerahamwe y’imyanya y’imirimo ya mbere n’iya nyuma y’ivugurura;

• Raporo y’isuzumabushobozi (2017/2018 & 2018/2019);
• Ishyirwa mu myanya ry’abakozi mu gihe cy’ivugurura;
• Abakozi bashyizwe mu myanya by’agateganyo (acting);
• Imyanya yahinduriwe inyito, intera cyangwa ibisabwa;
• Dosiye z’abakozi bashyizwe mu myanya;
• Abakozi basezerewe.

Nyuma yo kuganira ku ntego n’ibyagenzuwe, abari mu nama bagejejweho ikiganiro ku micungire y’abakozi no guteza imbere imyitwarire mboneza murimo.

Muri icyo kiganiro hagaragajwe uburyo butandukanye bwo gushaka umukozi wa Leta, amakosa akigaragara mu gushaka no gucunga abakozi ba Leta, igihombo Leta itezwa n’ibyemezo bifatirwa abakozi bidakurikije amategeko n’imyitwarire mbonezamurimo isabwa buri mukozi wa Leta. Hagaragajwe ko buri mukozi wa Leta agomba kurangwa n’Ubudashyikirwa n’ubunyamwuga, Kubazwa inshingano, Ubunyangamugayo no kwizerwa, Kwita ku bagenerwa serivisi, Gukorera mu mucyo n’ubufatanye.

Umuyobozi Mukuru wa NCDA yavuze ko bazakomeza kubaka ubushobozi bw’abakozi, kubakangurira kurangwa n’imyitwarire mbonezamurimo no kurushaho kuzuza neza inshingano zabo.

 Nyuma y’iyi nama NCDA izashyikirizwa umushinga wa raporo y’ibyagaragaye mu igenzura kugira ngo iwutangeho ibitekerezo mu gihe kitarenze iminsi 15 mbere y’uko hakorwa raporo ya burundu.

Mu gusoza, Umuyobozi w’ishami rishinzwe guteza imbere imyitwarire mbonezamurimo no kugenzura imicungire y’abakozi, Madamu NIKUZE Laure Ariane yibukije ko imicungire myiza y’Abakozi ba Leta, imyitwarire mbonezamurimo iranga Abakozi ba Leta n’imikorere ya kinyamwuga ari inkingi y’iterambere ry’Igihugu izafasha kugera ku ntego z’icyerekezo 2050 u Rwanda rwiyemeje kugeraho.