Kuri uyu wa 28/01/2022 Komisiyo y’Igihugu ishinzwe Abakozi ba Leta yagiranye ibiganiro n’Ubuyobozi bw’Akarere ka Gicumbi, ibiganiro byibanze ku micungire y’abakozi no guteza imbere imyitwarire mbonezamurimo mu Bakozi ba Leta.

Ibi biganiro byitabiriwe n’Abagize Inama Njyanama, Komite Nyobozi, Abayobozi b’Amashami, Abayobozi b’imirenge, Abayobozi b’Ibitaro n’abagize akanama gashinzwe imyitwarire.

Mu kiganiro cyatanzwe na Bwana NKURUNZIZA Fernand, Umuyobozi w’ishami rishinzwe kugenzura iyubahirizwa ry’amategeko yagaragarije abitabiriye inama uburyo umukozi wa Leta ashakwa , agacungwa ndetse n’uko ava mu kazi  bikurikije amategeko. Amwe mu mategeko akurikizwa mu gushaka no gucunga abakozi ba Leta yagaragajwe muri iki kiganiro:

• Itegeko N° 017/2020 ryo ku wa 07/10/2020 rishyiraho Sitati Rusange igenga Abakozi ba Leta
• Itegeko N° 18/2017 ryo kuwa 28/04/2017 rigenga Imicungire y’Imihigo igamije Umusaruro mu Nzego z’Ubutegetsi bwa Leta

• -Iteka rya Perezida N° 064/01 ryo ku wa 16/03/2020 rishyiraho sitati yihariye igenga abarimu b’amashuri y’incuke, abanza, ayisumbuye n’ay’imyuga n’ubumenyingiro 
• Iteka rya Perezida N° 128/01 ryo kuwa 03/12/2020 ryerekeye gushaka abakozi ba Leta n’amahugurwa ahabwa abakozi bagitangira akazi
• Iteka rya Perezida N° 021/01 ryo ku wa 24/02/2021 rigena imyitwarire mbonezamurimo ku bakozi ba Leta
• Iteka rya Minisitiri w’Intebe N°121/03 ryo kuwa 08/09/2010 rishyirahouburyo bukoreshwa mu isuzumabushobozi n’izamurwa mu ntera ry’Abakozi ba Leta

Perezida w’Agateganyo w’Inama y’Abakomiseri muri Komisiyo y’igihugu ishinzwe Abakozi ba Leta, Hon. SEBAGABO Barnabé yakanguriye Ubuyobozi bw’akarere gukurikiza amategeko mu byemezo byose bifatwa mu rwego rwo kunoza imicungire y’abakozi no kwirinda ingaruka zaterwa no kutayakurikiza.

Mu kiganiro cyatanzwe na Bwana MBONIGABA Etienne, Umukozi ushinzwe kugenzura imicungire y’abakozi no guteza imbere imyitwarire mbonezamurimo  yagaragaje ko ari ngombwa guteza imbere imyitwarire mbonezamurimo mu rwego rwo gushyira umuturage kuisonga no guteza imbere imitangire ya serivisi nziza mu nzego z’imirimo ya Leta nk'uko bigaragara muri Gahunda y’Igihugu yo kwihutisha iterambere (NST1) no Kubaka umuco w’imikorere ihuje n’indangagaciro nyarwanda.

Hagaragajwe ko nubwo Leta y’u Rwanda yakoze byinshi bijyanye n’imicungire y’abakozi, ishyiraho amategeko n’amabwiriza agaragaza ibigomba gukorwa, uko bikorwa n’indangagaciro zigena imyitwarire y’umukozi wa Leta, hakiri ibibazo bijyanye n’imyitwarire itaboneye bigaragazwa no kuba buri mwaka Abakozi ba Leta birukanwa kandi bagakurikiranwa kubera imyitwarire mibi.

Muri iyo myitwarire idahwitse igaragara kuri bamwe mu bakozi ba Leta  harimo: gucunga nabi umutungo wa Leta;imikorere iganisha kuri ruswa; ubuhemu; gucunga nabi ibya rubanda; itonesha n’icyenewabo; kugaragaza ubushobozi buke; kudakorera mu mucyo ; kutubahiriza amategeko mu gufata ibyemezo bigateza Leta igihombo.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta, Madamu Angelina MUGANZA yasabye abitabiriye inama ko nibura buri kwezi bajya bagirana inama n’Abakozi bakorana kugira ngo baganire ku myitwarire mbonezamurimo ikwiye kubaranga mu kazi.

 Umuyobozi w’Akarere ka Gicumbi, Bwana  Emmanuel NZABONIMPA yashimiye Komisiyo yateguye iyi gahunda yo kuganira ku myitwarire mbonezamurimo ayizeza ko  mu Karere ka Gicumbi bagiye kujya bakora inama zigamije kunoza imikoranire, bagafata imyanzuro ishingiye ku mategeko ndetse no kugisha inama Komisiyo aho bibaye ngombwa.

Ubu bukangurambaga bugamije guteza imbere imyitwarire mbonezamurimo biteganyijwe ko buzakorwa mu Uturere 7 two mu Ntara zitandukanye n’Umujyi wa Kigali n’ Inzego z’Ubutegetsi  Bwite bwa Leta 10.

Antoine SHYAKA

Public Relations and Communication Officer