Ku itariki ya 14 Mutarama 2023, Komisiyo y’Igihugu ishinzwe Abakozi ba Leta yasuye Akarere ka Nyagatare mu rwego rwo kuganira ku micungire y’Abakozi ba Leta, guteza imbere imyitwarire mbonezamurimo no gukora kinyamwuga mu bakozi ba Leta. Ikiganiro cyitabiriwe n’ abagize Inama Nyanama, Komite Nyobozi, Abayobozi b’amashami mu Karere, abashinzwe imicungire y’Abakozi n’abagize Akanama gashinzwe gukurikirana amakosa ku rwego rw’Akarere.

Umunyamabanga Nshingwabikorwa wa Komisiyo Madamu Angelina Muganza yasobanuriye abitabiriye ikiganiro inshingano za Komisiyo aho yagaragaje ko Komisiyo y’Igihugu ishinzwe Abakozi ba Leta yatangiye igikorwa cy’ubukangurambaga bwo guteza imbere imyitwarire mbonezamurimo no kunoza imicungire y’Abakozi mu Nzego za Leta kuva muri Mutarama 2022.

Umunyamabanga Nshingwabikorwa wa Komisiyo y’Igihugu ishinzwe Abakozi ba Leta Madamu Angelina Muganza asobanurira abitabiriye ikiganiro mu Karere ka Nyagatare inshingano za Komisiyo.

Abitabiriye ikiganiro baganirijwe ku mategeko ajyanye no gushaka abakozi mu nzego za Leta, n’uko umukozi wa Leta acungwa iyo amaze kugera mu kazi n’indangagaciro zikwiye kuranga umukozi wa Leta kugira ngo agere ku musaruro Igihugu kimutezeho, kandi hirindwe imicungire mibi y’abakozi kuko iteza Leta igihombo.

Nyuma yo kungurana ibitekerezo, hafashwe ingamba zikurikira:

1. Gushyiraho gahunda ihamye yo guhugura abakozi bagitangira akazi ku nshingano zabo, imyitwarire mbonezamurimo no gukora kinyamwuga na gahunda za Leta;
2. Gukora ibiganiro ku myitwarire mbonezamurimo kandi raporo y’ibyo biganiro igashyikirizwa Komisiyo y’Igihugu  ishinzwe Abakozi ba Leta buri gihembwe;
3. Gukora ubukangurambaga buhoraho ku myitwarire mbonezamurimo;
4. Gutumira Komisiyo y’Igihugu  ishinzwe Abakozi ba Leta  mu nama y’abakozi b’Akarere igatangamo ikiganiro kugira ngo kigere kuri benshi.

Abayobozi batandukanye mu Karere ka Nyagatare bagezwaho ikiganiro na Komisiyo y’Igihugu ishinzwe Abakozi ba Leta.

Umuyobozi w’Akarere ka Nyagatare, Bwana GASANA Stephen yashimiye Komisiyo ku kiganiro yabagejejeho, abizeza ko inama bagiriwe bazazubahiriza kandi ko bagiye kongera imbaraga mu gukorana ibiganiro n’abakozi ku myitwarire mbonezamurimo no gukora kinyamwuga  kugira ngo bizafashe kugera ku cyerekezo 2050 cy’u Rwanda.