Ku wa 11 Kanama 2023, Komisiyo y’Igihugu ishinzwe Abakozi ba Leta yagiranye ikiganiro n’Ubuyobozi bw’Ikigo gishinzwe Guteza Imbere Ibikorwa by’Iterambere mu Nzego z’Ibanze(LODA) hagamijwe gushishikariza Abakozi ba Leta gukora kinyamwuga, buzuza neza inshingano zabo mu rwego rwo kuzamura umusaruro w’Inzego bakoramo n’uw’Igihugu muri rusange. Icyo kiganiro kitabiriwe n’abakozi bose b’icyo kigo.

Nyuma yo guhabwa ikaze n’Umuyobozi Mukuru w’Ikigo gishinzwe Guteza Imbere Ibikorwa by’Iterambere mu Nzego z’Ibanze Madamu Claudine Marie Solange NYINAWAGAGA; Umunyamabanga Nshingwabikorwa wa Komisiyo y’Igihugu ishinzwe Abakozi ba Leta Madamu Angelina MUGANZA yashimiye Ubuyobozi bwa LODA umwanya bwageneye Komisiyo, asobanurira abitabiriye ikiganiro inshingano za Komisiyo harimo no guteza imbere imyitwarire mbonezamurimo nk’inshingano nshya Komisiyo yahawe, bityo Abakozi ba Leta bose bakaba basabwa kumenya no gusobanukirwa indangagaciro z’umwuga n’imyitwarire mbonezamurimo bikwiye kubaranga, bikabafasha kurangiza neza inshingano bashinzwe no kwihutisha iterambere ry’Igihugu.

Ikiganiro Komisiyo yatanze cyagarutse ku mategeko ajyanye no gushaka no gucunga Abakozi ba Leta, hamwe n’ingaruka ziterwa no gufata ibyemezo bitubahirije ayo mategeko, urugendo rwo guteza imbere imyitwarire mbonezamurimo mu Bakozi ba Leta, ingaruka zo kudakora kinyamwuga, indangagaciro zo gukora kinyamwuga n’imyitwarire mbonezamurimo bisabwa Abakozi ba Leta hagamijwe guteza imbere imitangire myiza ya Serivisi no kwimakaza  ihame ryo gushyira umuturage ku isonga.

Komisiyo y’Igihugu ishinzwe Abakozi ba Leta yijeje Ubuyobozi bw’ Ikigo gishinzwe Guteza Imbere Ibikorwa by’Iterambere mu Nzego z’Ibanze(LODA) gukomeza gufatanya mu guteza imbere imicungire y’abakozi no gukora kinyamwuga. Komisiyo yibukije abitabiriye icyo kiganiro kurushaho kubahiriza amategeko ajyanye n’imicungire y’Abakozi ba Leta, gusobanukirwa  ibyo bemererwa n’ibyo batemererwa n’amategeko. Ubuyobozi bwa LODA bwibukijwe ko ari ngombwa kubika ibimenyetso bijyanye n’amakosa yakozwe n’abakozi kugira ngo bizifashishwe mu gukurikirana mu rwego rw’akazi abo bakozi.

Umuyobozi Mukuru wa LODA yashimiye Komisiyo ku kiganiro cyiza yabagejejeho, ayizeza ubufatanye mu guteza imbere imyitwarire mbonezamurimo n’imicungire y’abakozi.