Ku wa 29 Nyakanga 2024 Komisiyo y’Igihugu ishinzwe Abakozi ba Leta yatangiye igenzura ku micungire y’Abakozi mu Kigo cy’Igihugu cy’Itangazamakuru mu Rwanda (RBA), irisoza ku wa 08 Kanama 2024. Umuyobozi mukuru wa RBA Bwana Cleophace BARORE yakira itsinda rya Komisiyo arishimira ku bw’umusanzu itanga mu mikorere n’imikoranire n’izindi Nzego za Leta ku guhugura no gutanga inama ku Bakozi ba Leta nk’uruhare rukomeye Komisiyo igira mu gukumira amakosa abakozi bakunze kugaragaramo.

Mu ijambo ry’Umunyamabanga Nshingwabikorwa wa Komisiyo Madamu Angelina MUGANZA yagaragaje ibyavuye mu igenzura ashimira Abayobozi ba z’Abakozi b’Ikigo gishinzwe Itangazamakuru mu Rwanda (RBA) ku mwanya bafata wo kwita ku nshingano z’akazi. Umuyobozi w’Ungirije w’Inama y’Abakomiseri muri Komisiyo Madamu KANAKUZE Jeanne d’Arc yagarutse ku kureba no kwita ku ihame ry’uburinganire uko ry’ubahirizwa muri RBA.

Ibyasuzumwe mu igenzura n’ibi bikurikira:

1. Imbonerahamwe y’imyanya y’imirimo ya RBA;
2. Gusuzuma niba Abakozi bari mu myanya y’imirimo bujuje ibisabwa;
3. Amadosiye y’Abakozi (ibaruwa, kopi y’impamyabumenyi iriho umukono wa noteri, equivalence y’impamyabumenyi ku bakozi bize hanze y’Igihugu n’icyemezo cy’indangabihano;
4. Gusuzuma niba Abakozi bari mu myanya aribo bahembwa (payroll);
5. Imihigo y’Abakozi n’isuzuma ryayo (imihigo y’umwaka n’imihigo y’igihe cy’igeragezwa);
6. Izamurwa mu ntera ry’Abakozi;
7. Gusuzuma niba hatangwa raporo z’amapiganwa;
8. Igenzura nyuma y’amapiganwa (post-recruitment 2023-2024) gusuzuma umwanzuro wa Komisiyo, panelists, imyanya y’imirimo yapiganishijwe, abakandida bashyizwe kuri waiting list, igihe amapiganwa yamaze)

Bwana NGENDAHIMANA Benjamin, Umukozi ushinzwe gutezimbere imyitwarire mbonezamurimo no gukora kinyamwuga no kugenzura imicungire y'Abakozi ba Leta, yatanze ikiganiro ku myitwarire mbonezamurimo anasobanura uko Abakozi ba Leta bashakwa, uko bashyirwa mu myanya y’akazi n’uko bacungwa no gukora kinyamwuga anabibutsa imyitwarire iranga umukozi wa Leta, uko agomba kwitwara mu kazi inshingira ku Iteka rya Perezida rishinzwe guteza imbere imyitwarire mbonezamurimo.

Mu gusoza Umuyobozi w’ungirije mu kigo cy’Igihugu gishinzwe itangazamakuru mu Rwanda (RBA) Madame ISHEJA BUTERA Sandrine yashimiye by’umwihariko Komisiyo anayizeza ubufatanye n’imikoranire bagiye kugaragaza mu rwego rwo kunoza no gukora kinyamwuga mu kazi kaburi munsi.