Icyumweru cyahariwe Abakozi ba Leta mu Ntara y' Amajyepfo cyabaye kuva ku italiki  ya 27/02-03/03/2017 mu Karere ka Nyaruguru mu Murenge wa Cyahinda n’Akagari ka Cyahinda, no mu Karere ka Huye mu Murenge wa Rusatira no mu Kagali ka Buhimba. Ku Biro by’Akarere, Komisiyo yagiranye ibiganiro n΄abakozi bose bakorera ku  Karere, Abanyamabanga Nshingwabikorwa b’Imirenege, Abayobozi b’Ibigo by’Amashuri, Abayobozi b’Ibitaro, Umuyobozi wa Farumasi y’Akarere, n’Abayobozi b’Ibigonderabuzima.  Ku Biro by’Umurenge hahurijwe  abakozi bo mu byiciro bitandukanye bakorera muri uwo Murenge, ku  rwego rw’Akagari, ahaboneka Abakozi ba Leta babiri (2), bagejejweho  ibiganiro barikumwe n’Abagize Inama Njyanama y’Akagari ndetse na Komite Nyobozi z’Imidugudu igize ako Kagari. Bwana Nkurunziza Fernand, Umuyobozi w' Ishami rishinzwe Ubujyanama mu myitwarire no gukemura Amakimbirane muri Komisiyo ishinzwe abakozi ba Leta yasobanuye ko mu biganiro byatanzwe Komisiyo yibanze ku gusobanura amategeko  agenga Abakozi ba Leta ariyo: Sitati Rusange igenga Abakozi ba Leta, Iteka rya Perezida rigena uburyo Abakozi ba Leta bashakwa n’uko bashyirwa  mu myanya, Iteka rya Perezida rigena uburyo bwo gutanga ibihano ku Bakozi ba Leta bakoze amakosa mu kazi, Itegeko rigena ibigenerwa umubyeyi wabyaye. Icyumweru cyahariwe Abakozi ba Leta mu Ntara y’Amajyepfo cyashojwe n’inama nyunguranabitekerezo ku itariki ya 03/03/2017. Mu gutangiza inama, Umunyamabanga Nshingwabikorwa wa Komisiyo ishinzwe Abakozi ba Leta Madame Angelina Muganza, yasobanuye  akamaro k' inama nyunguranabitekerezo  ko ari inama iganirwamo ibijyanye n' uko Abakozi ba Leta bashakwa n' uko bacungwa hagamijwe kugirango Uturere n'Intara igihe bashaka abakozi bubahirize ibiteganywa n' amategeko, n' igihe babacunga bubahirize ibiteganywa n' amategeko. Umunyamabanga Nshingwabikorwa wa Komisiyo yasobanuye ko  mu nama nk' iyi haganirwa ku byiza bigenda neza, cyane ko bihari bigenda neza nko mu gushaka abakozi hari ibisigaye bigenda neza kurusha uko byari bimeze ndetse no mu gucunga abakozi hari ibigenda neza kurusha uko byari bimeze. Mu kiganiro cyagejejwe ku bitaniriye inama nyunguranabitekerezo, Bwana Nkurunziza Fernand yagarutse kuri  bimwe mu bibazo basanze muri izo nzego z' ibanze ahanini bishingiye ku kutamenya neza amategeko. Urugero ni nk' ikibazo abayobozi b' ibigo by' amashuri bakunze kugaragaza ko bo batagira ikiruhuko cy' umwaka kandi mu by' ukuri impamvu ari uko atazi itegeko rimugenga ari ryo sitati igenga abarimu igaragaza neza uko Abayobozi b' Ibigo by' Amashuri n' abarimu bafata ibiruhuko byabo by' umwaka. Mu bijyanye no kubafasha kumenya ibyo batazi, avuga ko bagiye bamenyeshwa ibiganiro Komisiyo ishinzwe abakozi ba Leta itanga kuri Radio Rwanda buri wa kabiri 20h30, bakamenyeshwa urubuga rwa Komisiyo ishinzwe abakozi ba leta www.psc.gov.rw aho bashobora gusoma amategeko agenga abakozi ba Leta ndetse bakamenyeshwa nimero itishyurwa  39 99 ya Komisiyo bahamagaraho igihe baakeneye kugira ibyo basobanuza. Abayobozi n' abakozi mu nzezo zasuwe mu Ntara y' Amajyepfo na bo bagaragaje icyo iki cyumweru n' inama nyunguranabitekerezo bibasigiye. Bwana Semwema Misigaro John, Umujyanama mu mategeko w' Akarere ka Nyaruguru yavuze ko iki gikorwa ari cyiza, avuga ko guhugurwa ku mategeko ajyanye no gucunga abakozi ari ngombwa kugira ngo abakozi bacungwe neza, gushaka abakozi bikorwe neza bikurikije amategeko kuko imanza nyinshi inzego za Leta zihura nazo ari imanza zijyanye n' imicungire y' abakozi cyane. Bwana Misigaro John avuga ko kuba muri iyi Ntara nta manza nyinshi abakozi baregamo Uturere zihari ari umusaruro w' izi nama Komisiyo ishinzwe abakozi ba Leta itanga. Bwana Tuyizere Polycalpe, umujyanama mu mategeko w' Akarere ka Muhanga we asaba ko izi nama n' ibi biganiro Komisiyo ishinzwe abakozi ba Leta itanga bikwiriye kuba kenshi kuko aba bakozi bunguranamo ibitekerezo, bagasangira ubunararibonye, bakerekwa uko iyo umukozi ahuye n' ikibazo runaka yagikemura ndetse Komisiyo ikababwira ibyo batakoze neza, ibyo bikabafasha kongera kwisuzuma (auto-evaluation). Asaba ko izi nama zaba kenshi ndetse nyuma yazo Komisiyo ikajya yongera igasubira inyuma ikareba ko imyanzuro y' iyi nama iri kugenda ishyirwa mu bikorwa, kubera ko uko ushaka abakozi, uko ubafata, uko ukorana na bo ari byo bitanga umusaruro. Ashima uburyo muri izi nama buri Karere kagenda kagaragaza ibibazo kahuye na byo n' uko kagerageje kubikemura maze abandi bakabyunguranaho ibitekerezo. Agaragaza ko uko kungurana ibitekerezo bituma hari ibintu byinshi bunguka bibafasha gutunganya akazi kabo no kumenya uko hbashobora gukemura ibibazo bitandukanye bagezwaho, cyane ko haba hari n' abakozi b' ingeri nyinshi nk' abashinzwe amategeko, abashinzwe uburezi, abanyamabanga Nshingwabikorwa kandi bo mu Turere dutandukanye, buri wese ikibazo cye akakivuga ndetse n' abaturutse ku rwego rwa Komisiyo ishinzwe Abakozi ba Leta bakabitangaho inama birafasha cyane. Bwana Mvukiyehe Innocent Umunyamabanga Nshingwabikorwa w' Akarere ka Gisagara avuga ko ibiganiro nk' ibi bibafasha gusobanukirwa amategeko agamije gucunga neza abakozi. Avuga ko bibarinda kuba batanga ibihano bidashingiye ku mategeko ndetse bikabafasha kuba batazarira cyangwa ngo bananirwe gufatira icyemezo umukozi ukoze amakosa. Ati "biturinda kuba umuntu atajya muri gahunda yo kuvuga ngo 'ntiteranya' ahubwo ibyo dukora byose bikaba bishingiye ku mategeko no ku nama zidufasha kuyobora no gucunga ababoki neza". Bwana Mvukiyehe Innocent avuga ko hari ibibazo bahuraga na byo bijyanye no gushaka no gucunga abakozi aho mu mategeko babonaga mu bisabwa mu byo umukozi agomba kuba hyujuje kugirango apiganire umwanya runaka bitari bisobanutse neza, ariko muri iyi nama bakaba beretswe ibiri guteganywa kugirango bisobanuke ndetse berekwa n' uko bagakwiye kubikora. Ikindi ni ikijyanye no gutanga ibihano ku bakozi bakoze amakosa cyane cyane ku bakozi bakora mu burezi aho mbere byakorwaga n' akanama gashinzwe gukurikirana imyitwarire y' abakozi mu karere ariko muri iyi nama beretswe ko sitati igenga abarimu iteganya uko hashyirwaho akanama gakurikirana amakosa y' abakozi mu bigo by' amashuri. Bwana Mvukiyehe anavuga ko muri iyi nama basobanuriwe neza imikorere y' akanama gashinzwe gukurikirana amakosa y' abakozi mu karere, kuko batajyaga basobanukirwa uburyo aka kanama kayoborwa n' umuyobozi ushinzwe abakozi kandi hejuru ye hari abandi bayobozi, bakibaza uburyo umukozi yahamagara umuyobozi we amusaba ibisobanuro; ariko muri iyi nama beretswe ko Umuyobozi w' Akarere ashobora kugena undi muntu wo muri njyanama wajya muri ako kanama kugirango azibe icyo cyuho. Bwana Nkurunziza Fernand Umuyobozi w' ishami rishinzwe Ubujyanama mu myitwarire no Gukemura Amakimbirane, asoza agaragaza uko basanze imicungire y' abakozi muri iyi Ntara ihagaze kugera ubu ugerereranyije n' ibihe byashize. Avuga ko hari intambwe nini yatewe. Avuga ko bigaragazwa n' uko mu bujurire Komisiyo yakira, ubufite ishingiro bugenda bugabanuka. Agaragaza ko mu bujurire 17 bwo muri iyi Ntara Komisiyo yakiriye, ubujurire 1 gusa ari bwo bwari bufite ishingire kuko ari bwo bwagaragaje ko umukozi atari acunzwe neza naho ubundi 16 busigaye abakozi bari bacunzwe neza nubwo bareze bishobora kuba byaratewe n' uko bumvaga batanyuzwe ariko mu by' ukuri amategeko yari yubahirijwe. Alice Nambaje PRCO/PSC