Ku nshuro ya kane, umwiherero wahuje Inama y’Abakomiseri n’Abayobozi ba Komisiyo ishinzwe Abakozi ba Leta, wari ufite intego rusange yo gutanga inama no gushyiraho ingamba zituma Komisiyo igera ku nshingano zayo.

Umwiherero ukaba warasuzumye ishyirwa mu bikorwa ry’imyanzuro y’umwiherero w’Abakomiseri wabaye kuwa 19-21 Werurwe 2015; gahunda y’ibikorwa n’imbanzirizamushinga y’ingengo y’imari bya Komisiyo by’umwaka wa 2016/2017; n’inyandiko Komisiyo ikoresha mu kuzuza inshingano zayo arizo: amabwiriza ngengamikorere ya Komisiyo n’inyandiko igenga imitangire ya serivisi muri Komisiyo.

Nk’uko yasobanuwe mu mwiherero, amabwiriza ngengamikorere yateguwe hashingiwe ku mategeko ahari n’inshingano za Komisiyo.  Aya mabwiriza akaba akubiyemo uburyo  inshingano za Komisiyo zishyirwa mu bikorwa. Amabwiriza ngengamikorere ya Komisiyo akaba agiye gutanga umurongo ngenderwaho ku buyobozi bwa Komisiyo, ku bakozi no kubafatanyabikorwa.

Hateguwe kandi igitabo gikubiyemo serivisi zitangwa na Komisiyo n’uko zitangwa mu rwego rwo kugera kucyo abagana Komisiyo bayifuzaho  kandi no kumenya ibitekerezo byabo n’ibyifuzo kugira ngo serivisi zirusheho kunozwa. Iki gitabo kikaba cyarateguwe hashingiwe kuri serivisi Komisiyo itanga. Iyi nyandiko izafasha Komisiyo gusobanurira abayigana mbere y’igihe serivisi itanga n’ibyo basabwa kugira ngo serivisi bakeneye bazihabwe.

Muri uyu  mwiherero, Komisiyo yagiranye ibiganiro na  Minisiteri y’Abakozi ba Leta n’umurimo mu bijyanye no kuvugurura politiki, amahame n’amategeko agenga gushaka no gucunga abakozi no gukurikirana ishyirwa mu bikorwa ryabyo.  Mu kiganiro Madamu Comfort MBABAZI, Umuyobozi Mukuru ushinzwe imicungire n’Iterambere ry’Abakozi muri Minisiteri y’Abakozi ba Leta n’Umurimo yagaragaje ko mu kuvugurura uburyo bwo gushaka no gucunga Abakozi mu Nzego za Leta, muri rusange harimo kugeragezwa uburyo bwo gushaka akazi hakoreshejwe ikoranabuhanga (e-recruitment software). Iri koranabuhanga rikazajya rinatoranya abakandida basabye akazi bujuje ibisabwa.

Abitabiriye umwiherero bagiranye kandi ibiganiro na Guverineri w’Intara y’Amajyepfo Bwana Alphonse MUNYANTWARI washimangiye cyane akamaro ka Komisiyo mu gukumira amakimbirane aturuka ku kutubahiriza amategeko ajyanye no gushaka no gucunga Abakozi ba Leta.

Guverineri w’Intara y’Amajyepfo yagarutse ku kamaro ko kugenera amahugurwa y’imenyerezamwuga (induction guide) Abayobozi n’Abakozi ba Leta binjiye mu kazi,  guhugura abagize akanama gashinzwe imyitwarire (disciplinary committee), no  kongera amahugurwa mu Nzego z’Ibanze ku mategeko agenga imicungire y’Abakozi ba Leta. Muri ayo mahugurwa Guverineri yasabye ko hakongerwamo ay’imiyoborere (leadership) n’indangagaciro (ethics) ku bayobozi.

Imyanzuro yafatiwe muri uyu mwiherero izafasha Komisiyo ishinzwe Abakozi ba Leta kunoza inshingano zayo.

Alice Nambaje.